सेभ द चिल्ड्रेन र बाल विकास समाजको मिलेमतोमा करोडौं झ्वाम

 भक्तपुर ।बालबालिकाको क्षेत्रमा काम गरिरहेको काठमाडौं कपनस्थित बालविकास समाज र डल्लुस्थित कन्सर्न नेपाललाई दातृ संस्था सेभ द चिल्ड्रेनले कुनै अध्ययन नै नगरी करोडौं रकम दिएको खुलासा भएको छ ।

समाजलाई विभिन्न क्रियाकलाप गराएर बालश्रम न्यूनीकरणका लागि काम गराउन भन्दै सो संस्थाले पैसा खन्याए पनि त्यसको कुनै अनुगमन नहुँदा रकम अपचलन भएको रहस्य खुलेको छ ।

यसैबीच बाल विकास समाजले आफूले गर्दै नगरेका विभिन्न क्रियाकलापहरु पनि आफूले गरेको दाबी गर्दै र नक्कली प्रतिवेदन बनाएर सेभ द चिल्ड्रेन, जिल्ला प्रशासन कार्यालय र जिविसका कर्मचारीको आँखामा धूलो छ्याप्ने काम गरिरहेको देखिएको छ ।

हालै सेभ द चिल्ड्रेनले भक्तपुरमा गरेको समीक्षा गोष्ठीमा समाजले पुरै नक्कली प्रतिवेदन प्रस्तुत गरेको कुरा फ्लोरमै उठे पनि त्यसको जवाफ सेभ द चिल्ड्रेनका कूनै पनि प्रतिनीधिले नदिएपछि बालविकास समाजलाई सो काम गराउनका लागि सेभ द चिल्ड्रेनकै प्रतिनीधिको हात रहेको आशंका पनि गरिएको छ । त्यसो त खुलम्खुलै रुपमा सेभ द चिल्डे«नले आफूहरुलाई कागजी कुरो मिलाएमात्र पुग्ने र कामसँग कुनै मतलव नै नभएको प्रतिक्रिया पनि सम्बन्धित निकायबाट नआएको होइन । यसबारेमा अनुगमन गर्ने निकायको मुखमा बुजो परेको हो या त्यहाँ पनि आर्थिक चलखेल भएको हो भन्ने बारेमा व्यापक चर्चा चलिरहेको छ ।

यसैबीच प्रमुख जिल्ला अधिकारी तथा जिल्ला बाल कल्याण समिति भक्तपुरका अध्यक्ष अनिलकुमार ठाकुरले पनि सो विषयमा आफ्नो ध्यान गएको कन्सर्न नेपालद्वारा शुक्रबार भक्तपुरमा आयोजित सरोकारवाला निकायहरुसँगको बैठकमा जनाउ दिएका हुन । उनले भक्तपुर केही वर्षमै बालश्रममुक्त जिल्ला बन्न लागेको समयमा विभिन्न दातृ निकायको करोडौं रकम ल्याउने तर काम नगर्ने स्वभावका गैरसरकारी संस्थाहरुलाई निमित्यान्न पार्न आफूले कुनै कसर बाँकी नराख्ने बताउँदै बाल विकास समाजलाई इंगित गदै त्यस्तो विषयमा आफ्नो ध्यान गएको पनि बताए ।

त्यसो त सेभ द चिल्ड्रेनले बालबालिकाको क्षेत्रमा काम गरिरहेका कन्सर्न नेपाललाई पनि करोडौं लगानी गरेको छ । कन्सर्नलाई सन् २०११ देखि सन् २०१४ को डिसेम्बरसम्मका लागि एक करोड ९१ लाख लगानी गरेको बताइएको छ भने बाल विकास समाजलाई सन् २०१४ को जनवरीदेखि २०१४ कै जुन महिनासम्म गरी ६ महिनाका लागि १ करोड ९५ लाख रुपैंया लगानी गरेकोमा ६ महिनाभित्रै १ करोड ३६ लाखभन्दा बढी रकम सिध्याइसकेको समाजको तथ्यांकले देखाएको छ भने उसले कुन कुन क्षेत्रमा सो लगानी गरेको हो, त्यसको भने आधिकारिक तथ्यांक र काम देखाउन सकेको छैन । बाहिर चर्चामा आएअनुसार कन्सर्न नेपालको नाममा आएको बजेट सेभ द चिल्डे«नले बाल विकास समाजलाई दिएर सोही रकमबाट विदेश भ्रमणका नाममा लाखौं रकम सिध्याइएको बताइएको छ । यस विषयमा पनि अनुसन्धान भइरहेको बताइएको छ ।